السلام عليكم ورحمة الله وبركاته
اخواني واخواتي اعضاء المنتدي طبعا انا اسفة علي عنوان الموضوع لكن لما تقرأو الموضوع اعتقد انه هيكون عنوان مناسب فعلا
مقــــــــــــــــــــــــدمة
اي حد في الدنيا اكيد عنده طموحات نفسه يحققها وانا واحدة من الناس اللي نفسي احقق طموحي كنت برتب لمستقبلي اني اخلص كلية التربية تخصص الفيزياء واكمل كلية علوم وابدأ مشوار الالف ميل زي ما قال قبل كدا الاستاذ رجب.
البــــــــــــــــــــــــــــــدا ية
بدأت افكر كان نفسي بجد اني اعرف اكتر عن الفيزياء الحيوية واتخصص فيها ووقع اختياري علي التخصص دا بعد ان شاء الله ما اتخرج من كلية تربية كما وقع اختياري ايضا علي جامعة القاهرة لاكمل فيها دراستي
الحـــــــــــــــــــــــــلم
يوم امس حلمت خير ا للهم اجعله خير اني اتصلت بموظف مكتب التحويلات في جامعة القاهرة عشان اسأله عن الاوراق المطلوبة للتقديم لكن بعد السلام والتحية الموظف بيقولي ان المصاريف في السنة الواحدة8000جنيه مصري والاوراق المطلوبة كذا وكذا وكذا وخلصت المكالمة وبالتالي خلص الحلم سوري اقصد الكابوس
بس للاســـــــــــــف دا مكنش حلم دي مكالمة حقيقة!!!
يعنـــــــــــــــــــــــــي ايه؟
حد يقولي يعني ايه مصاريف جامعة حكومية في الوطن العربي في مصر تبقي 8000 جنيه في السنة يعني هنا التعليم بقي مقتصر علي طبقة الاغنياء فين العدل هنا فين المساواة فين حق التعليم مكفول للجميع فين وفين وفين
لــــــــــــــــــــــــــــــــــ ـيه؟
ليه حد نفسه يكمل ومعلق آمال كتيرة وكبيرة علي الموضوع دا تتقفل في وشه بالشكل دا؟
ليه هما هيعلمونا في جامعات امريكا ولا ايه؟
ليه هما هيدونا الدكتوراة مجانا بعد التكلمة؟
ليه هما هيضمنوا لينا فرصة عمل اكيدة بعد التخرج؟
ليه.................وليه........... ........وليه
المفاجأة!!!!!!!!!!!
المفاجأة ان المصاريف ارتفعت من 1000جنيه ل8000جنيه بقرار من مجلس اعلي للجامعات المصرية من 3ايام عارفين يعني ايه؟
المصاريف زادت بنسبة 800% اي مجنون قرر القرار دا!!
حد يقولي هما ليه بيعملو كدا ؟
هو مصر كلها اغنياء ولا ايه
حتي الاغنياء مش بيفكروا في التعليم الا القليل منهم
الطبقة الغالبة اللي بتفكر في التعليم بتبقي المتوسطة والفقيرة الناس بتتجه للتعليم لانه بالنسبالهم المفر الوحيد
في ناس كتير مستواهم المادي كويس وممكن يدفعوا 8000 جنيه في السنة لكن انا بقول
اي مجنون دا اللي هيدفع 8000جنيه في السنة في جامعة حكومية؟؟؟؟؟؟
استــــــــــــــــــــــياء
الغريبة ان الناس كلها والقيادات بتاعت الجامعات مستاءة جدا من القرار التعسفي دا واذكر منهم الاستاذ الدكتور محمد فهمى محمد حسين
أستاذ هيدرولوجيا وجيوكيمياء النظائر البيئية
قسم الأراضى والمياه
كلية الزراعة
جامعة القاهرة
ما شاء الله الدكتور محمد فهمي موقفش عند استيائه للي حصل بس لكن هو دلوقتي بيحاول يقوم بحاجات ايجابية عشان القرار دا يتلغي بأي حال من الاحوال.
الاقتـــــــــــــــــــــــراحات
في اقتراحات قدمها الدكتور فهمي عشان الموضوع دا يتحل ملخصها اننا مش لازم نسكت علي الاستعباط دا واسلوب التعسف دا في التعليم والتفرقة العنصرية وبجد لازم نتحرك كل اللي في ايديه حاجة لازم يعملها القرار دا مش هيقضي علي آمال وطموحاتي بس لكن هيقضي علي آمال وطموحات ناس تانية هتيجي بعدنا عاوزين نقدم شكاوي نوصلها لوزير التعليم العالي وننشرها في كل مواقع النت اللي ليها صلة ممكن نبعت من الشكاوي دي نسخة للصحف الحكومية وغير الحكومية
لو في محامي ليه في القضاء الاداري او محامي من المشاركين في الدفاع عن حقوق الانسان في مصر ممكن يرفع قضية مستعجلة جدا ً فى محكمة القضاء الإدارى المستعجل - وهى محكمة تصدر حكمها وقرارتها الملزمة للجهة الإدارية فى غضون 3 أيام إلى 7 أيام فقط لا غير - لإلغاء هذا القرار اللادستورى بسرعة شديدة وإلغاء كل ما يترتب عليه من تبعات على الطلاب مع الحفاظ على كافة حقوق الطلاب المتقدمين من حيث المواعيد المتاحة أمام الطلاب لتقديم الأوراق للكلية للإلتحاق بها مع إلزام الجامعة بالعودة فورا ً للعمل فى هذا الشأن وفقا ً للمصاريف القديمة السابق إجازتها قبل صدور هذا القرار التعسفى وإلغاء هذا قرار الزيادة التعسفى تماما
لمن يهمه الامر؟
انت مع مين؟تقدر تعمل ايه؟تقدر تساعد ازاي؟انت مؤيد ولا معارض؟مع القرار ولا ضد القرار؟
في انتظار ردودكم وحلولكم مش عاوزة حد يمر علي الموضوع مرور الكرام اتمني حلول بجد
ومن رأيكم مأساة دي وكارثة ولا؟
رد مع اقتباس
مواقع النشر (المفضلة)